Quand plusieurs des antiques Egipciens venoient à banqueter de compagnie, la coutume estoit que pendant le repas, l’un d’entre eus portant une image ou simulacre de Mort, s’en venoit le montrer à un chacun de tous les assistans: en leur disant l’un apres l’autre, Voy tu? Regardes bien que c’est que cela, faiz tant bonne chere que tu voudras, car ainsi te faut devenir. De l’avertissement & memoire de la fin, recite aussi Isidore, qu’à Constantinoble estoit l’ancienne coutume, que au jour du

couronnement de l’Empereur, comme il estoit en sa plus grande pompe & gloire, seant au trone Imperial, se presentoit un masson devant sa Magesté, lui montrant de trois, ou quatre sortes de Pierres, & lui disant: Trescher Sire, plaise vous de choisir & ordonner, de laquelle il vous plaira que lon fasse votre sepulture.

Claude Paradin, In hunc intuens,Devises héroïques (1557)